கால அளவு: இப்பயிற்சிகளை, 09.11.2026 ஆம் தேதி துவங்கி ஒரு மண்டல காலம் (48 நாட்கள்) தீவிரமாகவும் பக்தியுடனும் கடைப்பிடிக்க வேண்டும்.

காப்பு கட்டுதல்: கால பைரவரைத் துதித்து, மஞ்சள் துளிகளால் நனைக்கப்பட்ட ஒரு நூல் இழையைக் கையில் காப்பாகக் கட்டிக்கொண்டு சங்கல்பத்துடன் நோன்பைத் தொடங்க வேண்டும். 

உணவு: நோன்புக் காலம் முழுவதும் சாத்வீக உணவுகளை மட்டுமே உட்கொள்வது சிறப்பு.

09.11.2026 அன்று தொடங்கும் நோன்பு 27.12.2026 அன்று நிறைவடைகிறது. 48 தினங்கள் முழுமையாக கடைபிடிக்க இயலாதவர்கள், இந்த இரு தேதிகளுக்கு நடுவே எந்த ஒரு தினத்திலும் நோன்பை ஆரம்பிக்கலாம். ஆனால் நோன்பு நிறைவடையும் நாள், சத்குரு அகத்திய மகரிஷிகளின் குருபூஜை தினமான 27.12.2026 (மார்கழி ஆயில்யம்) மட்டுமே. அதிக தினங்கள் நோன்பு கடைபிடிப்பவர்களுக்கு பலன் அதிகமே!

1.48 தினங்களில் ஏதேனும் ஒரு நாளை தவறுதலாக நான் விட்டு விட்டால் என்ன செய்வது?

அடுத்த நாளிலிருந்து சீராகத் தொடரவும்.

2.ஆத்ம காயத்ரி நோன்பின் போது மது அருந்தலாமா? மாமிசம் உண்ணலாமா?

கண்டிப்பாகக் கூடாது.

3.மாதவிடாய் காலங்களில் ஆத்ம காயத்ரி நோன்பைக் கடைபிடிக்கலாமா?

சித்தர் வழிபாட்டில் இதற்கு எந்தத் தடையும் இல்லை.

4.ஆத்ம காயத்ரி நோன்பின் போது தாம்பத்தியத்தில் ஈடுபடலாமா?

விரதம் கடைபிடித்தால் ஆத்ம காயத்ரி நோன்பு அதிக பலன்களை நல்கும்.

5.காலையில் எழுந்தவுடன் குளிக்காமல் நோன்பின் மந்திரத்தை உச்சரிக்கலாமா? எந்த நேரத்தில் உரைக்க வேண்டும்?

குளிக்காமல் மந்திரம் உரைக்கக் கூடாது. காலை மாலை என எந்த நேரத்திலும் மந்திரம் உரைக்கலாம்.

6.மந்திரத்தை உச்சரிக்கும் பொழுது கண்கள் மூடி இருக்க வேண்டுமா?

கண்கள் எவ்வாறு வேண்டுமானாலும் இருக்கலாம். ஆனால் மந்திரத்தை உரக்க உரைக்க வேண்டும்.

7. நோன்பின் போது கடைபிடிக்க வேண்டிய உணவுக் கட்டுப்பாடுகள் ஏதேனும் உள்ளதா?

திட உணவைக் குறைத்து, கனிகள் மற்றும் நீர் சார்ந்த உணவுகளைப் பருகினால் மிகுந்த பலன் கிட்டும்.

8. வெளிநாடுகளில் வசிக்கும் எங்களால் அக்னி வளர்த்து, குருபூஜையைச் செய்ய இயலாத சூழலில், என்ன செய்வது? 

ஒரு விளக்கை ஏற்றி அதன் அருகில் அமர்ந்து, மந்திரங்களை ஒரு நாழிகை நேரம் உரைத்து, குருவுக்கு நன்றியை சமர்ப்பணம் செய்யுங்கள்.

9. நோன்பினை கடைபிடிக்க வயது வரம்பு உள்ளதா?

இல்லை, எந்த வயதினரும் கடைபிடிக்கலாம்.